由麥浚龍Juno執導，被戲稱為「都市傳說」的電影《風林火山》終於上映有期，鐵定10月1日香港及內地全國上畫。日前發佈了官方預告片，由原本的黑白變成部份彩色，不論劇本如何，相信美術及攝影方面定是目不暇給。Juno並於其社交平台介紹各主要角色。並附上金城武的官方專訪影片。
《風林火山》故事簡介:
被大雪侵襲的銅鑼灣，發生了規模空前的巨大爆炸和槍戰。 經過調查，這是一家全球製藥集團繼承人策劃的一系列瘋狂行動，最終導致李霧童(金城武飾演)的家族企業集團創始人父親身亡。 以創造「沒有毒品的世界」為主旨宣戰，使整個世界和地下世界陷入完全混亂。
人物介紹 (節錄自Juno Mak Instagram):
金城武飾演李霧童
黑社會家族承繼人
落地喊三聲，好醜命生成。
生於呢個家庭我冇得揀。
呢個家族係一盤生意，所以點講都好我都係一個生意人。
我份人比較理性，太多大世界遺留落嚟嘅套路我唔係好同意。
我唔相信呢個世界非黑即白。人亦唔止兩面。凡事明買明賣傾條件我反而覺得直白妥當。
我從來唔信亦唔明「忠心」呢兩個字嘅用意。
愚忠同愚蠢我睇唔到個分別。無條件嘅忠義，對我嚟講好可笑。
我甚至覺得「忠心」其實係一種精神病。
想將家族生意由黑變白，大世界會稱呢種崇高嘅改變叫浪子回頭。
稱得上「稱」，即係一種只流於概念化嘅只稱不做。
而原來要去實行一場撥亂反正嘅改變，大世界所換來嘅只有八隻滿帶貶義嘅字 –
離經叛道 眾叛親離。
梁家輝飾演狄文傑
前香港警員
曾經警隊嘅「明日之星」，感覺呢個已經係上個世紀前嘅事。
自我太太過身嗰晚開始，我個世界停頓咗。
算唔算一種自虐，我每晚都重複聽緊妳死前留俾我嘅留言。
算唔算一種自虐，我冇膽再去瞓一張沒妳在旁嘅床。
長年服用抗抑鬱藥物令我嘅記憶開始變得模糊。
若干年後嘅今日，久唔久警隊有啲咩案破唔到都會搵我返嚟幫手。而我多數都推得就推。定時服藥溝定時爛醉嘅黑夜好似更適合我。
不過今晚有啲唔同，電視機播住夜間新聞報道，市場上近日先出現藥物供求短缺，然後鬧市發生無差別槍擊，醫院應對唔到海量傷者，血庫更加一度失陷，三個鐘頭後一名喬裝成傷者嘅自殺式炸彈狂徒炸咗一幢醫院。而呢個人臨死前講咗句說話：「係咪真係可以洗牌再嚟過？」
看似一個又一個單一個別事件發生，我留意到嘅反而係一場骨牌效應。
我相信呢個世界有巧合，不過做咗咁耐人，我發覺到有好多巧合，到頭嚟其實都係人為。
高圓圓飾演劉思欣
藥劑師兼前精神科醫生。
我研究人類嘅普遍性，更加喜歡研究人類嘅特殊性。正如一般人見到火會驚，我更加想明白點解有人偏偏鍾意玩火，甚至撲火自焚。
我接觸過一個警察，佢太太被殘忍凌辱致死，但係呢個警察，習慣每晚臨瞓前聽佢太太死前嘅求救錄音先至瞓到，一般人最逃避嘅嘢，偏偏有人賴以生存。
如果我係佢嘅主診醫生，我唔會開藥比佢。
我治療過另一個人，佢話佢自己有五個名、五種職業。轉介佢過嚟嘅嗰位醫生話，佢患嘅係精神分裂同邊緣性人格障礙，可能得我先明白，呢個人唔係苦於自己嘅多重身份，佢只係唔想同自己活過嘅每一個身份告別。我開藥比佢，等佢可以繼續同自己嘅多個身份永存。
冇錯，「有病食藥」、「藥到病除」始終係人類根深蒂固嘅觀念。
因為人類需要「假希望」。每一個人心𥚃面都相信自己係幸運嘅一個。明白咗呢個道理之後，我冇再做精神科醫生，我成為咗一個藥劑師。
因為我知道呢個城市需要「希望」。哪怕，其實由冇藥嗰一刻開始，你嘅病先會真正開始步入痊癒。
劉青雲飾演王志達
緝毒科主管。
如果要問深一啲，我會話我其實副業當差，正職搵食。點解咁講？因為我有個女，單親，有病。我應承過佢，有一日我會帶佢去一個空氣好而又永遠冇人會搵到我哋嘅地方。而所謂嘅「呢一日」，近在咫尺。
我當差廿七年，坦白講資質上我從來唔算最標青嗰個，不過論膽色嘅話，我一定係最勇嗰個。撈咗咁多年先爬到呢個位，尤其做呢行，見過無數人彈起得越快，死得重快。
我曾經睇住一個朋友，佢叫文傑，佢同我差不多同期入職，好快佢已經成為咗警隊內嘅明日之星，仲不知幾多人羨慕佢娶咗個靚老婆，不過因為一件連環凶殺案唔單止犧牲咗個老婆，犧牲埋尊嚴，最後連份工都冇埋。
我份人比較現實。做乜都好，最緊要有推動力。我相信有供自然有求，緝返嚟嘅貨，七成入證物房三成供返出個市。呢啲叫做平衡。做人現實啲好，如果真係緝到條街一乾二淨，第一個冇咗份工嗰個只會係我。
古天樂飾演程文星
「清潔工」(殺手)
我冇老豆冇老母冇兄弟姊妹冇親戚冇朋友。冇喜怒哀樂，亦冇乜嘢好愁。
做我呢行，今日清人聽日隨時俾人清。個天唔知由幾時開始落雪，變得日短夜長居多。都好嘅，算係幫輕吓我哋做「清潔工」嘅，亦係對死人嘅一種尊重。話晒屍臭味，易認又難頂。
街上面眼見嘅地道文化亦唔知幾時開始變得名存實亡。例如當舖呢一行。行業要求存，就要轉型。
置身「成和大押」做清潔工，當舖規矩有當有贖，金勞伯爵棉被鐘錶樣樣收，不過只要黑市有價，手指人命器官鮮血我哋都照受。
做「清潔」呢行其實可以話冇規冇矩。冇話手無寸鐵唔郁得，亦都冇話傷風感冒老弱婦孺唔做得。我只係知道人命唔值錢，只要有市有價有柯打，我哋做「清潔」嘅就有工開。
撈咗咁多年，到底做呢行係咪真係冇規冇矩？
金科玉律兩樣記之曰：
一，同行屋企人唔搞得。
二，凡事靠自己，咪撚死。
「成和大押」入面，掌櫃奀叔、槍械歡姐（佢成日話要自己年紀大要坐輪椅，純粹只係佢份人懶。其實佢識行㗎）、啞巴清潔工燦頭、黑客/雜工小葉、同我。一個破碎人格嘅聚集點。
