職場事職場解決，不少人在離職後仍在數舊公司、舊老闆同事的不是，既然都唔做了，是否應該放下恩怨呢?

在職場打滾多年的你，人生入面總會遇上「西老闆」和賤格同事，有時或者未必全是他們的問題，只不過單純與你唔夾，點都做唔到朋友。

離職當日，禮貌上都會請對方食件散水餅的，然後佢對你講一句「一路順風」之類的客套說話，你唔好再話自己唔記仇，心裡一定仲記住佢(或佢地)當日點對你，但既然都唔做咯，心裡點諗是一回事，表面就乾脆大方回笑一下就可以。

有人會話什麼「江湖再見」，「今日留一線，他朝好相見」，有些恩怨是否真的可以藉著離職就一筆勾銷呢?

可以的，只睇你自己的心態!

唔洗講到以德報怨咁偉大，其實離職後什麼都唔洗做，舊公司發生的事就留在舊office，如果你仲成日記住以前老闆同事點衰呀要點報復呀，你會好辛苦，好難投入新工作架。

一份工 人生一堂課

舊公司的不快事情都是你人生寶貴的經歷，令你成長，亦讓你變得更強。

當你在新公司再遇到類似的人事問題，就告訴自己「以前嗰個同事咪仲衰，今次都一樣可以解決的」。

「俾人省完都從容不迫」是練返嚟的，你應該感謝以往遇過的所有西老闆和衰同事，是他們成就今日唔怕人罵的你!