飛叔療癒，Life

香港糖水文化背後的浪漫

贊助商連結

作者: 飛叔

「不如我地去九龍塘食糖水!」有返咁上下年紀的香港人，應該知道這個是暗語，即係去時鐘酒店開房咁解呀。舊年代的人比較保守，但亦可以說比較浪漫，「去食糖水」這樣婉轉地表達內心的渴求，似有種半推半就，半遮半掩的誘惑，我覺得總好過一嚟就話「去開房搞嘢咯」，太直接了，唔啱我咁含蓄的人!

贊助商連結

唔好誤會，我唔係想寫「甜故」，而是真的想講糖水，是去甜品店食真正的中式糖水，而非去時鐘酒店房內做事。

相比西式甜點，我還是覺得中式糖水比較討好，雖然一樣是甜品，中式糖水顯得冇咁Heavy，材料又較多用上養生和滋補元素在內，同樣是甜，至少甜得來在心理上都會感覺較為健康。只是純粹心理作用而已，事實上，一樣要落糖的。

以往多年前還有大班朋友飯局的日子，當食完晚飯後，時間又尚早的話，通常會有人問「有咩下場?」，在去酒吧和甜品舖之間，我定會投後者一票。唔好被我外表呃到，真的不太喜歡嘈雜的酒吧，反而去甜品店吃碗糖水，才令我感到自在。

南北杏雪耳燉木瓜 ($35) (深水埗綠林甜品)

年紀較輕時，去甜品店會被一系外表出眾的西式雪糕美點吸引住。我的確都迷戀過這類吸睛甜品，郤好快已經覺得這些不是最愛，間中一次還可以，但不會經常想吃。當人家在吃雪糕乜乜刨冰物物時，我依然都想叫碗「南北杏雪耳燉木瓜」，那種不過份的清甜，加上滋陰潤肺，真的教人愛不釋手。

開心果糊 ($44) (太子蘭苑饎館)

除此款之後，有時亦會吃其他的糖水，蘭苑饎館出品的「開心果糊」，單是看見青咇咇的顏色，已經令我開心不已。

人越大，就越懂得欣賞一些「老餅嘢」，中式糖水就是屬於這類老派食物，老派有存在之必要，就如正月初一十五要食湯圓一樣，傳統是不能取代的。

雪糕就宜快吃，糖水則不宜太快，是要逐啖慢慢吃的，就算一碗普通的芝麻糊，只要仔細去品嚐，都會吃到其特別的質感，那種甜是慢慢甜入心的，甜蜜效果可能好過任何人的甜言蜜語，至少我相信。

下次如果我再約你食糖水，千祈唔好以為有性暗示吧!

飛叔

香港飲食生活作家/資深Blogger Kelvin Leung「飛叔」，曾推出著作《吃破世情》。

如你喜歡此文章，請分享至:

發表迴響